మా పాలనలో పేపర్ లీక్ కాలేదు.. తెలంగాణలో నిషేధానికి గురైన కంపెనీకి కాంట్రాక్ట్ ఇచ్చారు: కేజ్రీవాల్

తమ పదేళ్ల ఢిల్లీ పాలనలోగానీ, నాలుగేళ్ల పంజాబ్ పాలనలోగానీ ఇప్పటివరకు ఒక్క ప్రశ్నపత్రం కూడా లీక్ కాలేదని ఆమ్ ఆద్మీ పార్టీ (ఆప్) జాతీయ కన్వీనర్, ఢిల్లీ మాజీ ముఖ్యమంత్రి అరవింద్ కేజ్రీవాల్ స్పష్టం చేశారు. దేశవ్యాప్తంగా పరీక్షా పత్రాల లీకేజీలు తీవ్ర ఆందోళన కలిగిస్తున్న నేపథ్యంలో ఆయన కేంద్ర ప్రభుత్వంపై తీవ్ర స్థాయిలో ధ్వజమెత్తారు.

కేంద్రంలో బీజేపీ అధికారంలోకి వచ్చిన నాటి నుంచి పేపర్ లీకేజీలు సర్వసాధారణంగా మారాయని ఆయన ఆరోపించారు. దీని వెనుక ఉన్నత స్థాయి వ్యక్తులతో కూడిన ఒక పెద్ద మాఫియా ఉందని, ఇది వేల కోట్ల రూపాయల వ్యాపారంగా రూపాంతరం చెందిందని విమర్శించారు. రాజకీయ అండదండలు లేకుండా ఇటువంటి లీకేజీలు జరగడం అసాధ్యమని పేర్కొన్నారు. గతంలో ఢిల్లీలో తమ ప్రభుత్వం పటిష్ఠమైన పాలనా యంత్రాంగంతో పరీక్షల సమగ్రతను కాపాడిందని, ఇప్పుడు పంజాబ్ లో ఉన్న తమ ప్రభుత్వం కూడా అదే పంథాలో నడుస్తోందని తెలిపారు.

ఈ సందర్భంగా, గతంలో తెలంగాణలో నిషేధానికి గురైన ఒక సంస్థకు సీబీఎస్‌ఈ 12వ తరగతి ఆన్‌స్క్రీన్ మార్కింగ్ కాంట్రాక్టును అప్పగించడాన్ని ఆయన తప్పుపట్టారు. సదరు కంపెనీ చేసిన తప్పిదాల కారణంగానే గతంలో 20 మందికి పైగా విద్యార్థులు ఆత్మహత్యలకు పాల్పడ్డారని ఈ సందర్భంగా గుర్తుచేశారు. అపఖ్యాతి పాలైన అటువంటి సంస్థపై చర్యలు తీసుకోకపోవడాన్ని ప్రశ్నిస్తూ, కేంద్ర విద్యాశాఖ మంత్రి ధర్మేంద్ర ప్రధాన్ తక్షణమే తన పదవికి రాజీనామా చేయాలని కేజ్రీవాల్ డిమాండ్ చేశారు.

నీట్-యూజీ 2026 పేపర్ లీక్ ఆరోపణల నేపథ్యంలో పరీక్ష రద్దు కావడంపై కేజ్రీవాల్ స్పందించారు. ఈ లీకేజీల సమస్యకు వ్యతిరేకంగా విద్యార్థులు, యువత దేశవ్యాప్తంగా నిరసనలు చేపట్టాలని ఆయన పిలుపునిచ్చారు. ప్రజల నుంచి తగినంత ఒత్తిడి రాకపోతే ఈ సమస్య ఇలాగే కొనసాగుతుందని, తద్వారా లక్షలాది మంది విద్యార్థుల భవిష్యత్తు ప్రమాదంలో పడుతుందని ఆయన హెచ్చరించారు.